摘要
Tī國小有一節「必修的臺語課」，國中kan-nā有「選修」的建議，tī幼兒園煞kan-nā規範「一禮拜有一工母語日」做kap臺語相關的教學、活動。語言的釘根ài愈細漢愈好，幼兒園是siōng好的時機。幼兒園的囡仔因為初初入學校讀冊，koh因為年歲細，需要大人顧前顧後，比國小、國中生khah需要生活照顧hām建立規矩；tsiânn-tsē幼兒園的老師會感覺，緊kā囡仔教hōo會當適應團體比教臺語khah要緊。這是會當理解的心情。其實，語言hām其他的學習並無衝突，一ê「全語言」的教學環境，會當用beh教的語言來達成彼科目kap其他科目的教學目標。幼兒園的老師應該ài放心仔tī母語日教臺語，kā臺語融入教學kap生活當中。只要是tī教室內底，m管老師上了juā活潑，用電腦，用多元的教具，師生互動對話tsiânn鬧熱，有遊戲的延伸，攏算做是靜態的教學；完整的教學，àikā靜態轉做動態，像tī校園內底的自然觀察，iãh是校外教學。行出教室創造美感經驗，tsiah會當hōo囡仔kā教室學著的物件結合實際的社區生活。老師若用臺語做校內外主要的教學語言，一定會當hōo囡仔學著臺語，mā學著生活的智慧。這篇論文用全語言的角度，來看一間附設tī小學的幼兒園，學生囡仔是按怎學臺語mā學著大自然的智識。研究目的是想beh增加幼兒園老師勇敢教臺語的信心。最後會提出tī幼兒園用臺語結合自然探索的結論kap建議。