李勤岸kah伊人間行踏詩作研究（一）

李勤岸是當代台灣重要ê台語文創作者、台語文使用論述者、傳述者kah運動者，論述伊ê mā袂少。本論文是以伊ê詩做範圍，用「行踏」來評論分析李勤岸出現tī伊詩作內底ê人生旅行。「行踏」這个台語語詞，tī教育部閩南語辭典ê解說是：『行為舉止』、『與人來往』、『走動』，本論文ê「行踏」主要包括三个部份，第一，是伊按怎號名、學習kah成長ê過程、社會ê經歷、參與ê社群；第二，分析伊當時ê心境和按怎影響伊本來使用華語後來行向台語詩人、語言學者kah台語文復振運動者ê路，來說明伊是按怎用台語kah台語書寫做伊進入社會運動ê方法；第三，是李勤岸tī故鄉kah異鄉四界旅行行踏ê地景書寫。最後綜合論述李勤岸tī台語文復振運動ê貢獻和對伊ê詩作研究做結論。